Eskalada: beste arrakasta handi bat

Ander Lorente Arregi naiz eta blog honetan nire eskaladako lagun taldearekin egindako bideen berri emango dut. 

Egindako bideen erreseina, krokis eta argazkiak lagungarri izango zaizkizuelakoan nago.

"Eskalatzailerik onena gehien dibertitzen dena da"

Uzturre: Egunkaria

Tolosan kokatuta dagoen Uzturre mendiko Egunkaria bidearen krokis eta erreseina dituzue jarraian.

• Zailtasuna: 6a+ 

• Luzera: 60m

• Luze kopurua: 2 (L1 6a+, L2 4)

• Norantza: hegoaldea

• Ekipamendua: paraboltak eta aniladun bilerak

• Gerturatzea: errazena Izaskunen aparkatu eta Uzturreko gurutzera oinezko bide arruntetik igotzea da, track hau jarraituz. Uzturreko gurutzean hesia pasa ekialderantz eta gurutzearen hegoladean aurkituko dugu goiko bilgunea. Bilgune honetatik 2 rapel eginda hasiko dugu bidea.
• Behetik gerturatzeko aukera ere badago, baina bidea ez dago erraz pasatzeko moduan.

• Jaitsiera: igo garen bide beretik jaitsiko gara. 

• Eraman beharreko materiala: 15 zinta express eta rapelatzeko materiala.

• Aparkalekua: Ibarrako Izaskun auzoan dugu gertuen dagoen aparkalekua.

• Erregulazioa: Uzturren eskalada debekatuta dago urtarrilaren 1etik uztailaren 31. Gipuzkoako Eskalada Guneen Araudian aurki dezakezu.

Tolosaldeko eskalatzaileen artean oraindik ere oso errepikatua ez den Egunkaria bidea egin dugu joan den asteburu honetan. Bideak Tolosa goitik ikuste aukera ematen du, momentuoro bizkarrean izango dugularik.

 

Krokisa

Kokapena

Azken irteera Riglos aldera egin ondoren, etxean jokatu dugu oraingoan. Mikelo, Xabi Martinez, Mikel Insausti eta laurok Tolosako Uzturre mendiko Egunkaria bidea eskalatzea erabaki dugu azkenean.

Kotxea Izaskuneko aparkalekuan utzi eta Uzturreko gurutzerainoko gerturatzea oinez egin dugu.

Izaskunetik Uzturrera

Igande goiza izanda, gurutzean ezagun asko topatu dugu eta eskalada hasterako taldeko argazkia ateratzeko aprobetxatu dugu. Eskerrik asko, Iosu!

Uzturreko gurutzean

Egunkaria bidea egiteko bi luzeak rapelatu eta ondoren eskalatzea erabaki dugu. Beheko aldea sasiz josita egoten dela jakin dugu eta gurutzetik gertu dagoen R2 bilgunean hasi dugu jaitsiera. R2 honetara iristeko goiko irudian ikusten den hesia gainetik pasa behar dugu, eskuineko aldetik (Anoetari begira dagoen aldetik). Helburua Tolosari begira dagoen hesiaren azpiko aldera pasatzea izango da. Honetarako segituan ikusiko dugu bidezidorra eta paraboltez lotutako soka bat. Soka hau jarraituz aurkituko dugu R2 bilgunea.

R2 bilgunera bidean

Bi bikote izanda, rapela montatzeko itxaron egin behar izan dugu Mikelo eta biok. Itxaroteko lekua erosoa da eta bertan dagoen soka finkora lotzeko aukera dago.

Mikel Insausti eta Xabi Martinez
 R2tik rapelatzeko prestatzen

Xabi rapelatzen hasi aurretik, Tolosa atzean duela

Itxaronaldian, Anoeta, Tolosa, Hernio edo Txindokiri begira egoteko aukera izan dugu.

Mikelo eta biok R2 bilgunean lotu aurretik

Anoeta, Uzturretik

Gure txanda iritsi bezala, lehen rapela montatzen hasi gara. Bilgunean eroso egoteko aukera dagoen arren, sasiak inguratzeko joera du. Gutxi errepikatzen diren bide hauetan (ea baita besteetan ere) mantenua egitea denon ardura dela uste dut eta itxaroten aritu garen bitartean inguruak txukuntzen aritu gara.

Mikelo R2 bilguneko rapela montatzen

Argazkilariak soberan izan ditugu gaurkoan eta hemen rapeleko argazki bat guruzera iristeko bidetik aterata.

R1 bilgunetik behera rapelatzen

R1 bilgunea erlaitz batean kokatuta dago eta oso erosoa da. Bigarren rapela egin eta bidearen hasierara iritsi gara.

R0 bilgunea ere sasiak hartzen hasita zegoen, baina nahiko egoera txukunean uzteko aukera izan dugu. Bilgune hau ez da aurrekoak bezain erosoa, baina paraboltez lotutako soka bat eta aniladun bilgune bat ditu lotzeko.

Ni lehen luzearen hasieran

Beheko luzea eskalatzen hasterako serio jarri behar izan dugu. Sarrerako momentan hasita eskalatu egin behar da eta despisterako aukera gutxi uzten du bideak. Luzearen erdiaren inguruan ezkerraldera zeharkaldi txiki bat egin beharko dugu, bidearen zati zailenari aurre egiteko.

Hasieran harriak ez digu konfiantza handirik eman, baina segituan konturatu gara kalitate onekoa dela eta bidea behar bezala garbituta dagoela.

Bide osoa oso ondo babestuta dagoela iruditu zaigu eta ekipatzaileak zoriondu nahi ditugu egindako lan bikainagatik!

Bigarren luzea amaitzen

Bigarren luzeko eskalada asko errazten da eta oso motza egin zaigu. Berriz ere gurutzera itzuli gara eta bertan egin dugu material guztiaren txukunketa.

Itzulerako bidean egindako eskalada komentatzen genuen artean, Izaskun Jatetxeko hain famatuak diren kroketekin amestu dugu. Ordutegiz kanpo iritsi garen arren sukaldariak salbuespen txiki bat egin eta ondo merezitako saria ekarri digu. Mila esker berari ere!

Izaskun Jatetxeko terraza

 

Riglos: Currucuclillo (Frechin malloa)

Rigloseko Frechin malloko Currucuclillo eskaladako bidearen krokis eta erreseina dituzue jarraian. 

• Zailtasuna: 6a+ (5+ beharrezkoa) 

• Luzera: 200m

• Luze kopurua: 9 (L1 6a, L2 5+, L3 6a+, L4 5+, L5 5, L6 6a, L7 5+, L8 6a, L9 4)

• Norantza: Frechin malloaren hegoaldea

• Ekipamendua: paraboltak eta aniladun bilerak

• Jaitsiera: Udako Zirkutik (Circo de Verano) oinez edota rapelatuz

• Eraman beharreko materiala: soka dobleak, 12 zinta express

• Aparkalekua: Rigloseko aparkalekuan

• Gerturatzea: Riglos herria gurutzatu elizaraino eta iritsi aurretik eskuinera ateratzen den bidezidorra hartu.

Krokisa

Aurtengo azken bidaia egingo dugu Riglos aldera Adur, Mikel G., Mikelo eta laurok. Blogeko lehen sarrera estrenatzeko ilusioarekin eta asteburu luze honek eskaintzen digun aukerarekin, bi edo hiru bide gozagarri egiteko asmoa ekarri dugu.

Goizean goiz abiatu gara malloetara 

Mikel G eta Adur Jose Antonio Sanz bidea egiten ariko diren bitartean, Frechin malloan bertan metro batzuk ezkerrago doan Currucuclillo bidea egin dugu Mikelo eta biok. 

Rigloseko aterpetxetik Frechin mallorako bidea

Kokapena

Bederatzi luze ditu bideak eta bakoitzari zein dagozkigon aukeratzeko makil txikienaren zozketa egin dugu. Mikelori hastea eta luze zailena (6a+) egokitu zaio, baina katu oinak aterpetxean ahaztu ditu eta korrika itzuli behar izan du.

Bitarte honetan, bidea nik hasi eta asteburuari hasiera emateko gertu jarri naiz. Tarte honetan Adur eta Mikel G. Jose Antonio Sanz bidea eskalatzen hasiak dira.

Mikel G lehen eguzki izpiekin aseguratzen

Adur JAS bidearen lehen luzean

 

                                       

Lehen luzeak itxura ona du. Bi sokarekin eskalatzea erabaki dugu, bideak S asko egiten dituela irakurri baitugu.

Lehenengo luzea

Lehen luzeak erdi lo harrapatu nau, paso pikante pare bat ditu eta eskalatzen hasi behar da. Ekipamendua egokia da eta buruz lasai hasteko moduko luzea da. Bilera erosoa da eta Mikelo ere eskalatzen hasi da.

Mikelo 1. luzean

Mikelo 1. bileran

Eskalatzeko giro paregabea dugu eta ezker nahiz eskuin ikusgai ditugun irudiak zoragarriak dira.

Adamello espoloia, Pison malloa eta Peña Rueba atzean

Bi soka eramatea gomendatuko nuke. Bidea ez da batere zuzena eta zinta luzeak jartzeaz gain bi sokak modu egokian jartzea komeni da. Lehenengo bileratik oso eskuinera irten behar da eta jarraian oso ezkerrera itzuli behar da.

Bidea ez da batere zuzena

Bilerak erosoak eta rapelatzeko egokiak dira bide guztian zehar.

Bilerak erosoak dira eta 3 pertsonentzat egokiak

Rapelatzeko anilak eta hirugarren parabolt bat aurki ditzakegu bileretan

Hirugarren luzea da bideko zailena (6a+). Pauso zailena dagoen tokian lau parabolt daude eta A0 eginda nahiko erraz ateratzeko modua dago. Hirugarren bilera oso eskuinean geratzen da.

Laugarren luzearen (5+) hasieran pauso pikante bat dago, hau ere A0 egiteko moduan.

Bostgarren  bilera ere oso eskuinean geratzen da, trabesia horizontal luze bat egin ostean.

Seigarren luzea (6a) aurrekoak baina gustorago egin dugu, asko gozatzekoa da.

Zortzigarren luzean (6a) harria konpaktatu egiten da sekzio batean eta eskalatzeko modua pixka bat aldatu behar da.

Ander eskalatzen, Visera ikusgai  eta Colorado malloa atzealdean

Azken bi luzeak (6a, 4) batera egiteko aukera dago eta halaxe egin dugu.

Azken luzea amaitzen

Azken luzea amaitzen

Denera 5h inguru pasa ditugu bidea amaitzen. Goian Adur eta Mikel G. itxaroten ari ziren dagoeneko. Jaitsiera oinez Udako Zirkotik egitea erabaki dugu. Hito bidez markatutako bidea jarraitu eta pixkanaka ipar-mendebalderantz joan behar da, Udako Zirkuko oinezko ibilbidearekin topatu arte. 

Denera 5h inguru pasa ditugu bidea amaitzen. Goian Adur eta Mikel G. itxaroten ari ziren dagoeneko. Jaitsiera oinez Udako Zirkotik egitea erabaki dugu. Hito bidez markatutako bidea jarraitu eta pixkanaka ipar-mendebalderantz joan behar da, Udako Zirkuko oinezko ibilbidearekin topatu arte. 

Currucuclillo agurtzen

Jaitsierako azken zatia Pison eta Fire malloen artetik egingo dugu. Jaitsiera ordubete ingurukoa da.

Jaitsiera Udako Zirkutik

Gailurrera begira

 

Riglos: Irene y la Paz (Frechin malloa)

Rigloseko Frechin malloko Irene y la Paz eskaladako bidearen krokis eta erreseina dituzue jarraian. 

• Zailtasuna: 6c (6a+ beharrezkoa) 

• Luzera: 200m

• Luze kopurua: 7

• Norantza: Frechin malloaren hegoaldea

• Ekipamendua: urre koloreko paraboltak eta aniladun bilerak

• Jaitsiera: Udako Zirkutik (Circo de Verano) oinez edota rapelatuz

• Eraman beharreko materiala: soka dobleak, 15 zinta express

• Aparkalekua: Rigloseko aparkalekuan

• Gerturatzea: Riglos herria gurutzatu elizaraino eta iritsi aurretik eskuinera ateratzen den bidezidorra hartu.

Kontuz ibili behar da 5. luzean, "Jose Antonio Sanz" bidea gurutzatzen baitzaio (parabolt grisak) eta ezkerralderantz jarraitu behar da.

Kokapena

Peña Rueba: Tierra de Dragones

Peña Ruebako eskaladako ekialdeko guneko Tierra de Dragones bidearen krokis eta erreseina dituzue jarraian. 

• Zailtasuna: 6b (V+/Ao) 

• Luzera: 375m

• Luze kopurua: 11 (L1 6a, L2 6a, L3 6a+, L4 4, L5 3+, L6 5+, L7 5+, L8 6b, L9 5+, L10 5+, L11 4)

• Norantza: ekialdea

• Ekipamendua: paraboltak eta aniladun bilerak

• Jaitsiera: rapelatuz edota oinezko bidetik (lurreko marka berdeak jarraitu). Oinez jaistea gomendatzen dut, rapeletako anila lurraren kontra dago eta soka bertan harrapatuta geratzeko aukera asko dago. Rapeleko lehen luzean zuhaitzak daude eta soka trabatuta geratzeko arrisku handia dago. Oinezko jaitsiera ordubete inguruan egin daiteke aparkalekuraino.

• Eraman beharreko materiala: soka dobleak, 19 zinta express (luzeak hobe)

• Aparkalekua: Murillo de Gallegotik iparraldera 2km joanda aurki dezakegu aparkaleku txiki bat.

• Gerturatzea: aparkalekutik ordu erdi ingurura, track hau jarraituz

Peña Ruebako mendizaleen artean oso ezaguna da Tierra de Dragones bidea eta 2014ean ekipatu zen. Bideak paisaia ikusgarriez gozatzeko aukera ematen du, Mallos de Riglos parez pare ikusiz.

Krokisa

Kokapena

Orain arte egindako esklada jarduera luzeena egin dugu Peña Ruebako ekialde honetan. Aurretik beste kordada bat topatu dugu eta 7h inguru behar izan ditugu igoerako 11 luzeak egiteko. 22 zinta eraman ditugunez, azken bi luzeak konbinatzeko aukera bakarrik izan dugu. 

Bidea oso ondo ekipatuta dago eta aurki ditzakegun pauso zailenetan parabolt ugari daude A0 egin eta jarraitu ahal izateko. 8. luzean daude pauso zailenak eta guk bustita aurkitu ditugu. 

Riglos, Tierra de Dragones bidetik ikusita

Lehen luzeko harria nahiko konpaktua da eta katu oin gogorrak eskertuko nituen egia esan. Hortik aurrera errazago jartzen dira oinak eta oinetako erosoak eramatea komeni da. Laugarren eta hirugarren maila duten bi luzeetan harri solte asko dago eta kontuz ibili behar da.

Tierra de Dragones eskalatzen

Bidearen amaiera

Azken luzeetan paraoltak elkarrengandik urrutirago aurki ditzakegu, baina gozatzeko luzeak dira.

Azken bilera miter (sabina) batean dago, bertan finkatutako soka batean.

Goian jarri dudan bezala, bidezidorra jarraitu eta lurrean dauden marka berdeen bidetik oinez jaistea gomendatzen dut. Bidea aurkitzeko nahiko erraza da eta soka finko ugari daude jaitsiera errazteko.

Santa Barbara (Hernani, Gipuzkoa)

Ekipatzaile nekaezinen lanaren ondorioz bizirik mantentzen den eskalada eskola klasikoa da Hernaniko Santa Barbara. Ondorengo estekan duzue krokis eguneratua.

Krokisak

Krokisak biltzen dituen liburuxka Donostiako Pio Baroja polikiroldegian duzue eskuragai.

Kokapena